لماذا نصوم؟ إجابة بسيطة لطفل فضولي
المحتويات
شهر رمضان شهر القرآن وهو شهر مميز جداً، لكن ممكن طفلك الصغير يسألك سؤال محير: “ليه بنصوم؟” أو “ليه منأكلش وبنعطش في رمضان؟”
السؤال ده طبيعي جداً، لأن الأطفال عندهم فضول لمعرفة كل حاجة حواليهم. علشان كده لازم نجاوبهم بإجابة سهلة ومقنعة.
ليه بنصوم؟
بنصوم علشان نتعلم نسيطر على نفسنا، ونقدر نقول “لا” للحاجات اللي بنحبها، زي الأكل والشرب، حتى لو كانت قدامنا. ده بيعلمنا الإرادة والقوة، ويخلينا أقوى في مواجهة التحديات.
بنصوم كمان علشان نهذب نفسنا، يعني نعرف نبتعد عن الشهوات والحاجات اللي ممكن تضرنا، حتى لو كانت سهلة أو لذيذة. ده جزء من التقوى، اللي هي خوفنا من ربنا وحرصنا على طاعته.
تخيل انك بتقدر تمسك نفسك عن الحاجة الحلال لمدة معينه من الوقت زى الأكل والشرب وغيرها من الأمور وقدرت تتحكم في شهواتك عشان لما ييجى قدامك الحرام تبقى انت متدرب ومتاكلش او تعمل حاجة حرام.
الصيام مش علشان نحس بالفقراء!
كثير من الأهالي بتحاول تقول لأولادها إننا بنصوم علشان “نحس بالفقراء”، لكن الطفل الذكي ممكن يسأل: “طب ليه الفقراء نفسهم بيصوموا؟”
ممكن نرد على الطفل إن الصيام مش بس علشان نحس بحد، لكن كمان علشان نقرب من ربنا، ونعبر له إننا بنسمع كلامه وبنطيعه من كل قلوبنا.
الصيام عبادة خاصة
الصيام مش مجرد امتناع عن الأكل والشرب، ده عبادة بتخليك تحس بوجود ربنا معاك في كل لحظة. حتى لو حد مش شايفك، وأنت قادر تأكل أو تشرب، لكنك مبتعملش كده علشانك عارف إن ربنا شايفك. ده بيعلمنا الإخلاص والالتزام عشان كدا ثواب الصيام حاجة كبيرة جدا وربنا وعد بيها وقال في الحديث القدسي: “إلا الصيام فإنه لي وأنا أجزي به”.
الصيام طريق للجنة
في رمضان، أبواب الجنة بتتفتح، وأبواب النار بتتغلق. والصيام ده طريقنا لدخول الجنة من باب الريان، اللي مخصوص للصايمين. لما نصوم بإخلاص.
رمضان شهر الخير والبركة
رمضان مش بس صيام، ده كمان شهر الخير والصلوات، زي صلاة التراويح اللي النبي ﷺ قال عنها: “من قام رمضان إيماناً واحتساباً غفر له ما تقدم من ذنبه”.
خلينا نعلم أولادنا
فهم الأطفال لمعنى الصيام مهم جداً. لازم نعلمهم إن الصيام مش مجرد جوع وعطش، لكنه طريق لتهذيب النفس، وتقوية الإرادة، والتقرب من ربنا. علشان كده، لما نساعدهم يفهموا المعنى الحقيقي للصيام، هيكون رمضان عندهم أجمل وأقرب لقلوبهم.
رمضان كريم، وكل سنة وأنتم طيبين! 🌙✨
